Novi Zakon norveškog Ministarstva za djecu i porodična pitanja zahtijeva od influensera i oglašivača da naglase koje fotografije objavljene na društvenim mrežama su retuširane. Na taj način pokušaće da suzbiju nerealne ideale ljepote. Fotografije na kojima je promijenjena veličina nekog dijela tijela ili struktura kože modela moraće da sadrži etiketu koju je osmislilo Ministarstvo za djecu i porodična pitanja. To podrazumijeva i da su smanjivanje struka, povećavanje usana ili “crtanje” nepoželjni.

Ovo će uticati samo na fotografije koje se koriste u promotivne svrhe, ali Zakon uključuje i fotografije koje dijele poznate ličnosti, odnosno influenseri, na platformama kao što su Instagram, TikTok, Facebook, Snapchat i Twitter. Drugim riječima, “pogođeni” su oni postovi od kojih influenseri zarađuju.

Ovo nije prvi put da su preduzete mjere protiv nerealnih ideala ljepote. Getty Images je iz svoje baze već izbacio retuširane fotografije, a i Francuska je 2017. godine uvela zakon koji modnim časopisima zabranjuje da objavljuju ovu vrstu fotografija.

„Ovaj Zakon je jedna od mjera protiv lažne ljepote. Nadamo se da ćemo dati značajan doprinos suzbijanju negativnog uticaja koje oglašavanje ima na sve ljude, a naročito na djecu i mlade“, naveli su iz Ministarstva.

Izvor: Media marketing